滿心歡喜出發去旅行，可惜......
由香港去倫敦班機唔知咩事遲咗起飛，令我們趕唔到轉飛去巴塞隆納個班機，亦未能安排其他直航機，原因係西班牙昨日大罷工，今日直飛巴塞隆納全部都冇位兼超賣，航空公司安排我們經里斯本再去巴塞隆納，唉，好無奈．
因為里斯本去巴塞隆納個程未能安排我們六人坐同一班機，唯有去航空公司希望可以安排吓，幾經波折最終都可以一齊，感謝主呀，不過已沒有時間兼心情麻麻，直接去閘口等上飛機．
去到里斯本，又要去航空公司度 follow-up 自己嘅行李，點知個地勤完全 1010，話見到四件行李不過唔知邊兩件唔見咗，佢幫唔到手之餘還令我們險些兒趕唔到班機，唉，連個正宗葡撻都冇時間見吓，唔好講話食吓．
幾經辛苦用咗２４個鐘才到達巴塞隆納.
全部行李都唔見，諗住去報失行李，俾我們見到三件係報失處，還欠三件，搵到個三件係由倫敦直飛巴塞隆納，里斯本個地勤話有四件唔知咩嚟呢，真係激鬼氣．唯有係機場周圍搵吓等吓希望找到啦，可惜用咗兩小時都係得個桔．在極度疲倦之下決定離開，原本行程係上午到達還有半日遊，現在太陽都落咗山都未去到 apartment，好唔開心．我兩公婆已經比較舒服啦，全部都係朋友搞掂，我唔識英文幫唔到手，只可以係旁邊做塘邊鶴，真係唔該 my dear friends，回來要請他們食飯補數．去到 apartment，又俾人罰錢話我們遲到，都費時同佢理論．後來發現 Wi-Fi 又唔 work，我們都係因為佢有 Wi-Fi 先選呢間，香港人冇得上網好唔方便嘛，但係佢話依家搞唔到，應承明天早上會整好俾我們，無奈之下只希望佢明天真係搞得掂啦．
終於十點才落街食晚飯，雖然間餐廳 La Fonda 都唔錯，可惜心情實在太低落又十分疲倦，食完後便回去睡覺，希望明天會更好．
No comments:
Post a Comment