後記 [Antony]

終於寫到後記，回想一吓這次旅程：

西班牙同英國天氣真係差異很太，在西班牙十幾天只有一天落雨，大部份時間天朗氣清，溫度亦很適中，十分舒服，不過山區會比較冷一些．在英國住幾天唔係落雨就濕濕悶悶，天寒地凍，太陽都好少見．

去之前對西班牙食物好有期望，西班牙炒飯，凍湯，生果酒，烤乳豬，海鮮，Tapas 好多好多嘢想食想試，但係食落又冇想像中那麼好，好似欠些少甚麼．相反，對英國食物完全冇期望之下，都可以，比想像中好好多．經過分析後發覺原來心情會影響味道，在曼城大部份時間心情都好靚，食咩都唔錯，只須要認真煮得好些，就覺得好味．但是係巴塞心情就麻麻受遺失行李和遇上小偷事件，食咩都好似麻麻地．還有如果餐廳環境靚啲，心情就會好啲，食物都好食啲，4 Cats 就係一個好例子，好懷念那裡的 lunch set，不過貴啲．

不過還是有很多食物令我回味，Segovia 嘅烤乳豬，皮脆肉嫩．Madrid 嘅 Chocolate con Churros，沾上朱古力的油炸鬼(真係幾似架)，好好味．4 Cats 嘅 lunch set，環境都已經好正，食物水準都唔錯．聖荷西市場嘅青瓜蛋餅，好好味，後來食過其他餐廳嘅蛋餅，都係薯仔做餡，好後悔冇 encore．La Fonda 嘅西班牙炒飯，飯不太硬海鮮味濃，都唔錯架．可惜自己出發前患上腸胃炎，唔敢飲酒，所以試唔到不同地方嘅生果酒，有些少遺憾．

住咗６間酒店每一間都滿意．個人喜歡 Sevilla 同 Manchester 呢兩間．Sevilla 那間古色古香．Manchester 那間超大，雖然係舊貨倉改建，不過我好喜歡，如果平日住仲抵．

西班牙的旅遊景點比較舊，兼冇乜做維修嘅感覺，而且入場費偏貴，不過都有一些地方值得一遊．Barcelona 嘅 Port Vell，如果遇上天朗氣清，真係超正．高弟的建築風格，真係幾不可思義，都值得一看．Granada 嘅舊城附有很重阿拉伯色彩，很是特別，又其是皇宮，一定不能錯過．南部嘅海岸和白色山城都唔錯．Sevilla，Segovia 的舊歐洲式城市都是一個不錯的選擇．不過我最最最滿意都係曼聯之旅，睇波，追星，超興奮，每次想起都想再來一次．

總結這次旅程，都可以講目標達到夢想成真．第一次係曼聯主場睇波，只可惜和波收場．第一次找球星簽名，都算大豐收，有簽名波衫(十七位球員簽過)，有簽名相(同小豆合照加簽名)，有球星合照(都有十幾個)．不過都有些不如意事：第一次飛機 delay 到要坐另一班機．第一次遺失行李．第一次旅行遇小偷．不過就是有這麼多第一次使這次旅程畢生難忘．

最後要講聲多謝，如果沒有朋友(Dorothy, Alex)約我一齊去，做咗曼聯球迷二十幾年，都唔知要等到幾時先去到主場睇波，如果冇去，對我來說一定係一大憾事．

Day 18 - 20101017 倫敦 [Antony]

今天係旅程最後一日．食完早餐便坐巴士去 London，足足坐咗四個幾鐘才到達，雖然辛苦啲不過超平比特價火車飛還平三分二．朋友 Dorothy 約咗舊老細聚舊，我便同 Alex 一起去 shopping，兩個男人有咩嘢買，緊係波衫啦，又有收鑊．

當我們去到機場地鐵站，想退回張 Oyster Card，才知道如果張咭內餘額多過 10 蚊，要填寫一大堆資料又麻煩又浪費時間，好彩我們早到咗，如果唔係就損失慘重．

之後好順利地辦妥登機手續，便去找餐廳食晚餐，最後一餐一定要食好啲，但找不到想食的餐廳，心想出境後再找找看，可惜很多餐廳已開始打烊，九點就收工真嘆，但我就慘喇，臨走食餐好啲留個好印象都唔得，唯有是是但但買個包，好彩佢肯整熱俾我，食完便去閘口等上飛機．終於回程喇，非常準時到達香港．

西班牙英國之旅 - 小朋友篇

西班牙英國之旅

一直都覺得小朋友好可愛, 見到佢地得意既樣時, 真係好想影低佢地, 但係又覺得唔係幾好意思, 影人地既細路仔.

既然作為遊客, 可以為所欲為, 見咩影咩, 今次我就唔客氣喇.

可惜係無靚機同無技術之下, 亦不能講究角度同遠近, 但求偷影到幾多得幾多, 所以效果都只係麻麻地, 不過總算係西班牙影到差不多七十個小朋友可以見得下人, 其中有數張係偷我d 拍檔既.

BB 仔好可愛.






大個一點既小朋友, 衣著都好有型.



西班牙 Flamenco 舞衣下既小妹妹, 真係好婀娜多姿 !



多謝各位小朋友包容同合作.

Day 17 - 20101016 曼城 [Antony]

今天係大日子，我們會去主場睇曼聯對西布朗嘅英超聯賽，開賽時間係下午三點．

早上起床便一起落街食早餐，我們走入一間餐廳後發現有很多曼聯球迷，再看餐牌好似昨日食午餐個間，果然味道唔錯兼很有氣氛．食完還有時間四圍 look，行到差不多時間便回到酒店拿背包出發，我們還 print 了昨日同球星合照的相，希望可以找小豆幫我簽名．

我們先坐電車到朋友 Rose 間酒吧拿飛，這間酒吧好出名係 Liverpool Street，好多曼聯球迷幫襯，張飛終於到手喇，仲係季票嚟架，不過要分開坐，冇辦法喇一票難求．之後坐的士去球場附近，再慢步入去感受吓周圍氣氛，好似嘉年華會，又有小食檔又有紀念品檔．半路中還遇見昨天係 Carrington 識嘅小朋友，真係好有緣．

去到球場我要同朋友分道揚鑣，當我去到自己位置時好開心好興奮，因為位置好靚，好近睇得好清楚．上半場曼聯攻另一邊，大部份時間都唔係我呢一邊進行，兼坐我旁邊嘅球迷相對大隻，出現咗很大的黑點．當我全程投入時不知不覺間站起身(其實當時係有機會入波)，後邊的球迷好大聲叫我坐低，之後我就唔敢再企起身，驚俾人打．我們這邊又冇唱歌兼啲球迷好斯文，全程坐著睇，氣氛麻麻哋比我上次睇作客差好多．就這樣靜悄悄地完成上半場，2:0曼聯領先，不過傑斯完半場前傷出，我想已曼聯這樣水銀瀉地的攻勢，下半場我這邊一定睇得好開心．

下半場開始，冇咗傑斯成隊都走晒樣，大部份時間又係另一邊進行，點解會咁架，完全唔明，結局係2:2打和，好失望呀，超唔開心．

散場後，約咗朋友等球星離開，這是我們最後一個追星活動．見唔到傑斯，朋友好失望，雖然有些球員因和波而沒有心情簽名，但都俾我再簽到幾個，馬捷達，奧巴坦，史摩寧，終於我件衫有十七個簽名，都好滿意．還找到小豆幫我們的合照相簽名，超開心，心情好番好多．

離開球場後，便回到 Liverpool Street 同我們好朋友 Jenny 食飯，因 Rose 工作太忙同唔到我們食飯，好可惜呀．當我見到 Jenny 個仔樂樂又係穿短衫短褲，越來越覺得自己老喇．晚飯在酒吧附近一間印度餐廳，味道都唔錯還好地道．只不過我們隔壁坐著一大班外國人又飲又唱超 high 呀，令我們不能好好地說話．食完後我們坐 Jenny 車回酒店．明天要返香港喇，心情開始失落喇．

西班牙英國之旅 - Day 17 曼徹斯特市 (Part 2) [Dorothy]

2010 年 10 月16 日

為了答謝 Jenny 幫我地搵人讓波飛, 我地好想同 Jenny 一家人食番餐飯, 可惜Jenny 老公要返工, 只得佢同大仔可以賞面陪我地, Jenny 介紹左一間好得既印度餐廳 Akbar's俾我地, 雖然曼聯今日嬴唔到, 但係我地都渡過左一個開心既晚上.

前菜 - 脆薄餅, 呢個唔係叫既, 每檯都有, 唔加汁都好好味.



前菜 - 炸蝦, 唔記得叫咩名, 但好好食.



前菜 - 烤羊架, Jenny 朋友極力推介, 好香好味喎, 一d都唔騷.



其實我地仲叫左個炸雞翼, 不過食哂至記得影相. 成餐飯除左因為掛住傾計, 又因為曼聯和波, 同埋傑斯受傷, 所以都有d 失魂, 好多食物既名都唔記得左.

呢個係咖哩雞之類, 都幾好.



呢個係羊, 都ok.



呢個係雜菜, 好味.



Fish Biryani 魚黃薑飯, 好好味.



薄餅, 得呀.



蒜蓉薄餅, ok.



呢一餐好好味, 但佢地太細食, 我不停食不停食, 都係食唔哂, 原來呢度都有好多印度人, 所以印度餐館都好多同好正宗.

食完飯, Jenny 仲車埋我地返酒店, 真係麻煩哂佢, Thank you very much!!


Akbar's
Manchester Liverpool St

西班牙英國之旅 - Day 17 曼徹斯特市 (Part 1) [Dorothy]

2010年 10 月 16日

西班牙英國之旅 - Manchester [Day 17]

今日係曼聯主場迎戰西布朗既大日 子，亦都係我地第一次入奧脫福睇比賽，心情相當興奮，之於波飛方面， 我地搵左住係曼城既好朋友Jenny幫我地買飛，Jenny 有個開酒吧既朋友幫我地搵到季票，坐位唔錯， 只可惜我地三個人唔可以一齊坐，因為三張飛有一張係北看台， 有兩張係西看台，我地當然想一齊坐啦，咁會開心d, 但睇情況應該無可能，Antony好好人, 犧牲自己讓左alex 同我坐, 佢就同讓季票出黎既伯伯坐。

今朝我地係酒店附近逛逛, 想搵間似樣d 既餐廳食個傳統英式早餐，見到呢間唔錯喎, 咦，真巧, 原本又係 Wetherspoons! 即是昨天我地食午餐個間. 呢間有好多著哂曼聯波衫既球迷係到食野, 我地都係喎, 果然無揀錯地方.



英式早餐真係好大份超豐富, 食左佢午餐都唔駛食呀.



呢間餐廳唔同地點就收唔同價錢, 呢間貴過奧脫福球場附近個間少少.





今日天氣好好, 竟然有太陽, 不過都係好凍.



但都有人覺得唔凍, 剩著吊帶衫, 勁呀.



呢度今日仲有市集呢.





三點先開波, 食完早餐仲有時間shopping 下.



放低戰利品後就出發到酒吧攞波飛，酒吧附近既風景都好靚。







去到奧脫福附近心情就更興奮，估唔到今朝多手攞左副黑超竟然用得着呢！



唔少得既梗係要四圍影相，影影下突然聽到有人嗌 "Hey! HongKong!".好有緣呀, 估唔到竟然在七萬球迷中, 可以巧遇番前一天在訓練場認識的愛爾蘭朋友仔! 尋日先第一次見面, 今日可以撞到仲比佢地認出, 黎張合照先.


















呢三張就係朋友幫我地搵番黎既season ticket, 五十磅一張, 用完要還既.



入場啦, 因為Antony 坐北看台, 所以要同佢暫別一陣.

















嘩, 我地既西看台位係山頂位, 要爬好多層樓梯呀.



上到黎三樓看台，見到個球場真係好大好宏偉．




快ｄ睇下見唔見到 Antony先, 雖然好遠同好有保護色, 但勁zoom埋去都見到既．



開始熱身啦，yeah, 見到傑斯喇．







開波啦，傑斯正選，前鋒有小豆同貝碧，而朗尼就後備．



呢個就係我地既位置，第三十四行，只差幾行就上到頂，一開波，後排既西看台球迷就自動自覺企哂起身，吓，又係企位，而且仲不停唱曼聯既歌，同兩年前我地睇作客布力般一樣，全程企到睇聽住歌，我見到南同北看台既球迷都係坐到睇，西看台真特別，氣氛真係好正．



要數氣氛正同震撼，梗係要睇入球啦，睇片：



下面係唱歌打氣既片段



好開心，上半場２５分鐘， 曼聯已經２：０，不過可惜傑斯半場前受左傷要換出．



下半場既後備席都唔見左佢了，唔通佢走左？

最終賽果係２：２，當然有ｄ失望．



完場後我地又趕去停車場位置，搵定個好位等傑斯，等左大約４０分鐘，就開始有球員走，可能嬴唔到波，三個人既心情麻麻地，竟然一張相都無影．愈等愈唔對路，咁耐都無傑斯，唔通佢真係半場時走左，早知我半場時落黎搵佢啦，唉，連拜拜都無句！

見ｄ球員走，都係一家大細，原來太太團真係會黎捧場，而朗尼最近受到醜聞困擾，心情極差， 聽說佢太太話未原諒佢之前係唔會黎捧場睇波，今日佢太太都有同小朋友黎， 唔通已經原諒左朗尼？

Day 16 - 20101015 曼城 [Antony]

因為昨天有收獲，而且那裡真係又凍又荒涼，早上又少人肯停車，之後還要無所事事兩個幾鐘食西北風，所以決定遲啲去齋等收工．我們係火車站旁嘅快餐店食早餐，不過味道完全唔掂，相都冇影過，忘記它吧．

食完便出發去 Carrington 訓練場，到達後只看見一個男孩球迷，不過佢好勁，邊架車係邊個球員都記得，大部份都講中，全靠佢我哋有咗準備，成功率提高好多，而且今日還有小朋友，好多球星都願意為他們停車，收穫豐富．

我們到了沒多久還未到收工嘅時候，我們見男孩停咗架車同司機吹水，但我們望極司機都唔知係邊個，後來走咗才問佢，佢話係華倫西亞，因他受傷所以坐係後排，走寶啦．之後越來越多球迷到達，終於等到收工嘅時間，第一個係馬捷達(Macheda)，之後係大細孖(Rafael，Fabio)，然後係維廸(Vidic)．

我看見韓國球迷拿件球衣簽名兼受朋友影響，諗諗吓都係整番件簽名球衣留念吓．第一個幫我簽球衣係星仔(Park)，之後有奧沙(O’shea)，伊雲斯(Evans)，奧雲(Owen)，艾夫拿(Evra)，史摩寧(Smalling)，傑斯(Giggs)，里奧(Rio)，卡域克(Carrick)，小豆(Hernandez)．不過朗尼(Rooney)，史高斯(Scholes)都係唔肯停，蘇斯克查(Solskjaer)見唔到應該未放工．除咗傑斯外，我覺得小豆都好平易近人，又冇架子，個人好 nice，來者不拒兼有球必應，好有大將之風．

之後坐巴士去奧脫福，因為昨天張飛包博物館，今日還用得著所以再去參觀．落車係巴士站附近找間餐廳食午餐，呢間餐廳 The Bishop Blaize 味道唔錯．參觀完後見到有球迷開始等球員，因為明天有比賽，球員會到這裡集合再一起坐隊巴去酒店集宿．等吓等吓落起大雨，我哋就十五十六究竟離開還是繼續等，終於決定等多陣睇情況，話晒未睇過兼今次目的係追星嘛．

等等吓雨又細番，估唔到有啲球員都肯冒雨簽名，嗱嗱臨拎件球衣出來，哈哈，有俾我簽多幾個名，有雲達沙(Van der Sar)，蘭尼(Nani)，安達臣(Anderson)，費查(Fletcher)，貝碧托夫(Berbatov)．

終於滿心歡喜離開球場，返回市中心 Piccadilly Garden 嘅 Rice 食東南亞菜，味道 ok la，唔算出色．之後回酒店休息，明天去主場睇波，係第一次同七萬幾球迷一齊睇曼聯踢波，好興奮呀，今晚唔知訓唔訓得著呢．

西班牙英國之旅 - Day 16 曼徹斯特市 (Part 2) [Dorothy]

簽哂名，我地就收拾細軟，準備離開，唔知係唔係我地手腳慢定係其他人快呢？當我地行番去民居既時候已經唔見哂其他球迷啦，除左南韓球迷係我地前面之外，沿途真係好荒蕪，不過今日有部外賣車同幾隻馬係附近。





一如昨天，我地又搭巴士到奧脫福， 今日係巴士站附近一間餐廳 Wetherspoons 食左午餐先.





揀呢間餐廳就係因為俾呢碟甜辣醬炒麵既相吸引住，而呢碟麵亦真係好好食，而且好抵, 唔駛兩磅, 漢堡包同洋蔥圈都好食. 呢度既食物好過昨天既快餐店好多.









之後就去行奧脫福既博物館..





後生既費sir原來都幾靚仔.





行到去西看台附近, 已經見到有球迷係停車場附近等球員了， 因為聽日有比賽， 所以球員今日黃昏揸車返黎集合一齊搭旅遊巴士到酒店集宿， 明天一齊返黎奧脫福比賽. 原先我地都無諗過等唔等, 不過見時間又差唔多, 不如見識埋睇下有咩收獲.

[反而黎manchester 之前我就真係有諗過去酒店搵傑斯, 不過見呢兩日成績都唔錯, 就不要做吊靴鬼了, 不要惹人討厭喇 !]





當幾十個球迷興致勃勃等緊既時候, 天公不造美, 原先天陰陰, 突然落大雨, 係勁大雨, 攪到大家好狼狽之餘, 連有d球員一離開自己部車就即刻跳上旅遊車, 唔肯幫球迷簽名.



加利仔依然唔肯過黎, 我地只可以影低佢部車, 估唔到佢係揸日本車toyota咁低調.



之後d 雨細左就好d 啦.



蘭尼肯簽名.



終於影到雲特沙喇.


不過真係太多球迷, 所以好混亂, 都係覺得係Carrington 訓練場好好多.

疑似費sir 既人就一早上左車嘆報紙了.