後記-好彩無堅持

Dorothy:

如果我地堅持去英國睇曼聯一定要睇主埸的話, 我地最大機會, 最有可能就係睇曼聯對史篤城(Stoke City).

今晚係屋企睇左曼聯對史篤城呢場波, 又無傑斯, 又無朗尼, 原來佢地有傷, 連後備都無, 好彩我地無堅持咋, 睇下佢地今埸既陣容 : 雖然曼聯都嬴左5比0, 但始終如果用左甘多錢, 甘辛苦飛十幾個鐘, 都睇唔到傑斯同朗尼, 就一殼眼淚, 而家就有d執身彩既感覺 !!

其實揀睇邊埸波, 真係有d博一鋪既感覺, 而家望番轉頭就知我地買中左.

後記-巴黎kit kat

Alex:

歐遊踏足法國, 盒裝KitKat當然有特別留意, 不過沒有收穫. 偶爾在Metro站內的販賣機見到一款包裝特別的膠袋裝KitKat, 不是一般見到的紅色封面. 係藍色的, 有個KitKat星球加上穿梭機. 即刻奉上個幾歐羅買番包.


原來是法國KitKat為了推廣其全新KitKat製法 (Nouvelle Recette), 而推出的包裝. 除止之外, 仲有一個new site, 廣告, 遊戲.... 可以贏得一次太空旅遊 (唔知堅定流).

大家不妨去個site睇下.. (http://www.kitkat.fr/)
個廣告都幾得意, see see

至於個KitKat就同平時差不多, 比較脆, 唔知同Nouvelle Recette有無關. 又或者係新鮮?

想睇多d有關盒裝kit kat 既介紹, 可以 click 入呢個網址 : http://alexccc.blogspot.com/
(唔覺意賣左廣告添)

後記-巴黎地鐵 (Metro)

Dorothy :

好彩有Antony做足功課, 知道Paris有一隻叫做Orange Card o既星期車票, 只需16.8 歐羅就可以由星期一至星期日於巴黎市內zone 1 至zone 2任搭Metro (地鐵) 同巴士. 相比起單程Metro車票1.6歐羅, 化算很多.
因為剛好我o地留在巴黎的日子係星期日至六, 而且我o地會去o既地方只有凡爾賽宮及聖米歇爾山不在zone 1 至zone 2內, 有左呢張Orange Card 任搭, 就方便啦, 可以慳番唔少腳骨力，搭錯車都唔肉痛。今次我地總共用Orange Card搭左28程Metro 加 巴士，平均一程只需要0.6歐羅, 抵好多.

(另外如果逗留在巴黎既日子唔夾Orange Card, 想搭車慳d錢都仲有一個選擇, 就係一次買十張單程票, 約11歐羅就可以. Orange Card 係需要一張相)


巴黎既地鐵站係好密, 都算好方便, 不過因為分左14條線, 如果要轉線有時都幾麻煩, 可能要行好遠. (呢個係巴黎地鐵既website: http://www.ratp.fr/ , 有英文既)

有時搭巴士都幾方便, 係巴士站有列明路線圖, 所以搭巴士都唔太難.

唔見過都唔知, 巴黎既地鐵係俾帶狗一齊搭架，有一次無為意地鐵門打開, 竟然見到有一隻黑色狗企左係地鐵內, 好彩係有綁住既, 不過我都被佢嚇一嚇, 彈左過隔離度門至敢上車, 唔怪得, 成日都覺得巴黎地鐵好臭, 一陣陣尿味啦 !

後感-Alex

Alex:

Harrods, 一間London最有名的百貨公司, 我地當然有到此一遊. Harrods外表同裡面都幾富麗堂皇. 入到去我地只係匆匆逛了不足一小時. Why?



因為呢間百貨公司居然聘用不少保安在百貨公司內尋找有無顧客孭背囊, 一一發出警告-在百貨公司範圍內只准用手拿背囊, 不准孭上. 真係令我地覺得好唔方便兼無自由, 十分無癮. 有點敗興而回.


很多英國人(特別係倫敦)都給我覺得佢地自視過高, 喜歡擺款..此乃example 1.

法國就真係比較自由o既地方, 雖然未至於係好服務, 不過無o甘擺款同少d管束就令你立時覺得舒服d.

後感-Dorothy

Dorothy:
計劃左4個幾月既14天歐洲之行, 等就慢, 玩就快, 甘就完結左啦, 好彩我都無餓親, 而且仲揾到好多好味野食. 倫敦同巴黎比較, 我就覺得巴黎d野食好味d, 尤其是牛扒, 因為係倫敦食左三餐牛扒, 有兩餐好難食! 係巴黎食生蠔, 真係好新鮮, 但係唔知點解d生蠔好咸, 咸過係香港食既好多好多, 我食左三次總共十三隻生蠔, 好彩腸胃都無敏感, 早知唔敏感, 我就唔客氣食多d啦!

今次能夠夾得到四個人,係一次旅行內,親身睇到曼聯同英格蘭比賽,真係好難得, 簡直係 Mission Impossible! 仲要係我地無爭執, 講都無人信呀!

今次雖然我好滿意呢次既旅程, 但係我仲有d心願未了，我仲未能夠同傑斯真人影相, 我地未入到奧脫福, 我仲未係巴黎見到張曼玉, 可能因為佢成日掛住係北京拍拖, 唔通，真係要去多次 ?

另外我覺得,普遍巴黎人都好友善,對遊客好好,試過好幾次,我地攞住地圖係街四圍望,有d迷茫既時候,身邊就有個巴黎人主動走出黎幫手,佢地d英文都好好,溝通完全無問題. 反而係倫敦時,我覺得倫敦人好忙,好急,有d冷漠,有d好串,無論係地鐵定係係街,我覺得企係邊都好似阻住佢地.所以都係巴黎人好d.

後感-Ceci

整個旅程很舒服和玩得很開心，最遺憾沒能夠和朋友(新婚夫婦去意英渡蜜月)在倫敦 High Tea.

後感-Antony

Antony:
今次英法之旅, 法國給我的印象沒有想像中的美麗, 還有一些若有所失的感覺. 但在英國現場睇波的感覺十分興奮, 雖然在電視觀看比較清楚, 但現場的氣氛真是一絕, 完全將觀眾的情緒帶上頂峰, 使這次旅程有不枉此行的感覺.
首 先要多謝的人是 Dorothy and Alex, 如果沒有他們的邀請, 我想都未想過可以親身去現場睇波,雖然支持了曼聯將近二十年和之前去過英國兩次, 但因為我老婆無興趣睇波, 所以只有空想. 行程編排雖然是我做的, 但實際帶隊是他們倆, 沒有他們在法國食乜都唔知. 還有他們不遲努苦陪我完成所有行程內的景點, 令旅程沒有一點兒遺憾, 真係多謝哂.
第二個要多謝的就是我們的好朋友 Jenny 和她的朋友 Rose, 如果沒有她們的幫忙, 我們也不能看到感動人心的球賽, 真是衷心多謝她們.
最後要多謝緊係我老婆, 又出錢又出力, 冇興趣都陪我們欣賞球賽, 都算唔話得.

Day14-回到香港

Alex 13-Oct:
幸運手繩
呢條就係10 Euro o既幸運手繩, 你睇o下開始果陣織得幾好, 幾緊密. 見你無心比錢兼仲要講價, 越來越織得差, 散得o甘滯. 本來佢要收我20 Euro, 幾經週旋先攞番10 Euro. 貴就貴D, 不過效果神奇...
張Orange車票係買手繩當日行完Peoguet車行, 離開無耐突然聽到 "s'il vous plaît" 回頭一望, 先見到車行職員攞番張Orange車票比我. Merci!! (註:Orange車票係有相o既). 所以去旅行真係要補番一兩句當地language. Au revoir !!
Here is the useful basic language site http://www.bbc.co.uk/languages/other/quickfix/

Day14-到達香港

Antony 13Oct:
還有一件事本來唔想講，但係忍不住，頭幾天天氣時陰時雨，還刮大風，相當凍，穿所有衫上身都唔夠，直到我們去到聖心教堂，朋友在黑人手中買了一條唔值十歐元的幸運手繩，但之後天氣便開始放晴，之後再沒有下雨，到最後我們只穿短袖衫還覺熱，真誇張．還有朋友在途中跌了張車票值十幾歐元的，都有好心人拾回來給我們，幸運手繩真是名副其實，信不信由你．

Day13-最後一天

Antony 12-Oct:
今天是最後一天，早上每人食了一個豐盛的英式早餐.

然後出發參觀大英博物館.

看完後再去 Oxford Circus 作最後衝刺，買完手信便急急腳回酒店拿行李去機場．

要回香港心情更係十分失落，兼忘記了將鵝肝罐頭寄倉，險些兒給關員沒收了，雖然幸運地沒有沒收，但已浪費了我很多時間，最重要係我沒有時間血拼機場，還不只這樣，到了閘口想在自動售賣機買樽水都唔知因乜事買唔到，黑起上嚟真係有紋有路，令我心情跌到落谷底，悶悶不樂地上機回港．

Day12-又有得睇波

Dorothy 11-Oct:
超期待英格蘭對Kazakastan呢場世界杯外圍賽既來臨.





好開心，現場親身看到, 親身感受到英格蘭入波, 九萬球迷興奮跳起的心情, 英格蘭嬴5比1，朗尼好波, 又­有碧咸落場，碧咸有一段時間無得代表英格蘭國家隊, 就算再次入選, 又未必場場有得踢, 今日我地好好彩, 唔止我地開心, 有好多英格蘭球迷一見到碧咸出場, 都開心到企係到拍手掌大叫，當然我都係其中一個啦，原來仲有好多英國球迷鍾意碧咸.






而且我們用60英鎊就買到中場第­7行，當然60英鎊一d都唔平，但相比起買山頂位都要50英鎊，60英鎊就買到非常中間非常前既位，就變得好正，好抵­!

同曼聯球迷比，英格蘭球迷就理智d，全場大家都坐到睇，只有特別情況先企起身歡呼，唔駛好似上次睇曼聯甘全程罰企。

Day12-溫布萊睇英格蘭

Antony 11-Oct
今日要回倫敦，沒有安排節目，閒逛附近的超市和街市，便出發回倫敦.






因 Eurostar 減少班次和行駛時間增長，令我們不能和朋友在倫敦見面真是失望，兼時間十分緊迫，到酒店放低行李，便立即出發去溫布萊球場，到達溫布萊公園車站，人山人海。









心情開始興奮，雖然這場波是不經意地找到的，還令我們一再更改行程，但結果沒有令我們失望還令這次旅程劃上完美的句號，英格蘭大比數勝出，Beckham 後備上場，Rooney 入波，九萬人一起睇波，……，令我十分滿足．




回到酒店附近，因為是最後一餐晚餐和想慶祝一番，所以食貴啲，原本倫敦都有好味的牛扒，雖然貴，還是值得的．

Day11-鴨肝醬

Dorothy 10-Oct:

今次巴黎之行發現法國既鴨肝醬超好味, 只係口感不夠鵝肝醬滑溜, 對我黎講又唔係甘重要, 只要將鴨肝醬放在鬆脆既多士, 又或係外脆內軟既法飽, 都可比美鵝肝醬, 但係價錢應該可以平好多,之前day 6既頭盤已經令我印象深刻。

今日係凡爾賽宮附近既class' croute 食左個期間限定既栗子鴨肝醬法飽, 價錢只係5.4歐羅, 已經有三大片好厚既鴨肝醬, 好好味.

呢度只係三分一個

三大厚片既份量可能已經等於我地後來用6歐羅買既小罐頭, 而且我地買既仲要係有鴨肉係裡面充撐場面添, 所以我相信class' croute 佢地用既鴨肝醬成本唔會太高.

我真係好後悔無問佢地用邊隻罐頭, 可能佢地唔介意話俾我呢d遊客聽, 我地又唔會同佢爭生意, 最可惜係佢地無分店, 係巴黎市中心唔會揾到佢地. 呢個係佢地既website : http://www.classcroute.com/ , 我地就係食左 Sandwich foie gras Kamok-Chataîgne, 希望佢會變成長期都有，如果唔係, 都可以試 L' Aristo Baguette, 呢個都係鴨肝醬, 真係希望佢地開多d分店啦, 開埋黎香港或者新加坡就更加好啦。

我地最終都唔夠時間, 訪尋又平又正既鴨肝醬罐頭, 睇怕呢個任務都要留番俾出年去巴黎既Anthea喇!

而好味既鵝肝醬, 我地係巴黎北站(Gare du Nord)既HEDIARD買到, 但係價錢要25歐羅一罐得210克咋.

Day11-凡爾賽宮

Antony 10-Oct
今天重點行程：凡爾賽宮，坐 RER C 線去到凡爾賽宮站後再步行十幾分鐘左右便到達門口，望入去真係好大，我們看見很多人排隊買票，但是明明書上寫是免費的，問工作人員又答非所問，幸好發現遊花園是免費的，入宮內參觀就要收費，都係慳啲好．雖然沒有入內參觀但是花園好大兼好靚，真係值得山長水遠來欣賞一番。


行了兩個鐘都只遊了一半左右，我們實在好倦，便決定回程．在車站旁找了一間三文治店，本來沒有期望，但是食落十分美味和唔硬，再追加一個特別推介的鵝肝飽，十分正，完全令我重新評價法國麵包，好嘢一定要細心地找．





















回到巴黎市中心，便去 Pierre Herme 食杏仁餅和牛角飽，都不錯，但牛角飽都係 Paul 好食啲．




因為在回程途中，有一個善談的法國人和我們閒聊，建議我們到聖路易島食晚餐，和我們記得島上有出名的冰淇淋，所以我們便決定勇闖聖路易島，還發現島上有一條街有很多店舖適合遊客閒逛，我們買了一些鵝肝罐頭當手信，不經不覺到了食晚餐的時候，找了一間感覺不錯的餐廳，食物質素都算不錯，只是比百年老店貴了些，都令我相當滿意．