前奏-Dorothy

Dorothy:
一直都無意欲去歐洲, 點解今次突然會有衝去歐洲嘅計劃呢 ?

其實都係因為曼聯係上季嬴了雙料冠軍，突然覺得支持咗曼聯十多年，點都應該去親身看一埸現場比賽, 而且我又擔心傑斯好快就會退休，遲d可能無機會看到佢踢波，更何況今年係我同alex結婚十週年紀念，應該做啲特別啲嘅野去慶祝.

做一個甘大型嘅project，最重要就係要有錢同人嘅支持喇，貴為首席曼聯球迷嘅alex, 當然無反對喇，旣然錢唔係問題，就要組軍啦，無理由兩個人去咁悶o架嘛，梗係要搵埋另一位首席曼聯球迷antony喇，嘩, 一拍即合，難得嘅係, 連唔睇波嘅ceci都大力支持, 你話感唔感動呀!

今次真係要多謝antony，因為佢花了無數嘅時間, 安排行程, 交通, 酒店, 美食等等, 所有細節都有佢打點，令到成個旅程都非常順利同好玩，而且最重要係, 由原先打算睇一場曼聯, 到最後竟然係睇埋英格蘭，睇到朗尼入波嬴波不特止, 仲要睇到碧咸落埸踼，簡直興奮到震，好彩多得antony醒目留意到。

要數最著數係邊個，梗係我喇! 又有人出錢, 又有人出力，印印腳就有個超級興奮嘅旅程!