天未光便出發去隆達(Ronda)，點解？因為巴士班次不算頻密，如果買唔到飛要等個幾鐘才有下一班．去到車站但售票處未開，再等了一回又覺得唔對路，所以周圍問人，終於平安上到車．
接近兩個鐘才到達目的地，下車後便到附近餐廳食早餐．因車站附近無旅客服務中心，所以食完後便”盲中中”自己搵路行，雖然不算難找，但為何冇指示呢，唔通啲旅客唔坐巴士嘅．
行吓行吓見到個廣場都幾靚，附近啲建築物又幾特別，影相留念後再繼續前進．
終於到達第一個景點鬥牛場(Plaza de Toros)，呢個鬥牛場都幾有名氣，因為隆達是鬥牛的發祥地，所以我們都入場參觀吓，步行到場中間轉個圈，嘩，正，一座圓型兩層高的建築物，我唔識點形容，自己睇相喇．係場中影吓，行去場邊又影吓，坐上觀眾席都影吓，超 high．鬥牛場內還有間博物館介紹鬥牛嘅歷史，我們都行咗個圈，雖然鬥牛係西班牙嘅文化，但我始終覺得殘忍咗啲．
終於找到間旅客服務中心係正鬥牛場隔壁，識得行到嚟呢度都唔多須要佢啦，不過我都入咗去買張名信片和郵票兼寄埋，一條龍服務都幾好．
之後再向前行看見一個公園，它在崖邊上，望下去都有百米深，向前看被群山環繞，都幾好 feel，可惜遇著有人在拍攝兼有警察在睇場，不能行近去影相，有啲失望．
繼續向前行終於到達今日重頭戲新橋，它建築在峽谷(Tajo)之間，近看又唔覺得好宏偉，向下看又唔覺得好深，有些少失望可能係我期望太高，但我們都係不同角度幫佢影相．我還俾咗兩蚊落去參觀吓，不過超失望，簡直有搵苯嘅感覺，只係入咗一間房，有幾部電視介紹吓，我原先諗住可以落到底，再由底下影上來，拍出它的宏偉，依家......唉．
之後係附近食午餐，餐後沿新橋由新城區走入舊城區，舊城區真是名副其實，啲建築物又殘又舊，慢步行逛，唔經唔覺又返回新城區，便回車站搭車返 Malaga．
到達 Malaga，我們行逛巴士站旁的火車站商場，之後去市中心試咗間專門店食”朱古力油炸鬼”(Chocolate Churros)，都幾盞鬼架．時間尚早便再四圍 look，兼順路找地方食晚餐，行吓行吓都係返回昨天食晚餐個間嘅隔離個間，都好好味還一樣實惠，食完後便回酒店睡覺準備明天去白色山城內哈爾(Nerja)．
Subscribe to:
Post Comments (Atom)
No comments:
Post a Comment