因為心情太緊張，瞓得麻麻哋，一早(06:30)便起床等出發．煮杯麵沖咖啡做早餐，食完便坐電車去 Sales 站再轉的士去 Carrington 訓練場，不過的士去唔到門口要步行一段距離才到．
到達門口，同保安 Jims 收吓風，好彩冇遲到，未有球員返咗嚟．我最想見係傑斯，蘇斯克查，星仔，馬捷達同小豆，朗尼和史高斯都想不過聽聞佢哋唔肯停車．第一個停車係里奧(Rio)，然後係史摩寧(Smalling)，跟住貝碧托夫(Berbatov)，其他都冇停車可能係趕時間操練．不過我好失敗呀，當我反應到佢係蘇斯克查(Solskjaer)時，架車已經在我前面開走咗，如果我醒目啲，應該停到，我好後悔呀．雖然收穫麻麻，但都好過食白果．繼續等佢哋收工，可惜天氣真係麻麻，又濕又凍，等吓等吓又下起雨粉，好彩冇變大，唔係都幾麻煩．
終於等到佢哋收工，肯停車有比比(Bebe)，安達臣(Anderson)，費查(Fletcher)，大細孖(Rafael，Fabio)，真係一模一樣架．
然後係傑斯(Giggs)，嘩，我哋超開心，又影相又簽名，不過佢真係好好人，又冇架子，有求必應，哈哈，我們終於達成夢想．最後一個係卡域克(Carrick)．Jims 提醒我們球員走晒，因為蘇斯克查現在係教練好遲先走，而且天氣實在太凍，再等耐啲，我驚頂唔順，都係走喇．今日收穫都算滿意，不過我哋有啲手忙腳亂，影得相嚟就簽唔切名，因為找唔到相片，所以朋友話明天再來一次好唔好，我們梗係贊成啦．
之後我們坐巴士去奧脫福參觀球場和購物，本來想在 Red Cafe 內食午餐，點知熱食賣晒，天寒地凍點食凍嘢呀，立刻去附近快餐店食個包，味道麻麻．之後又趕回球場 join Tour，參觀 Tour 時，見到個小朋友穿短袖衫，我著咗四件都震緊，真係唔認老都唔得．
睇完買完心滿意足便離開球場返回市中心食晚餐，去返前年我們大家都好喜歡嘅太湖酒家食中菜，一樣咁好味，好滿足咁行返酒店．
Subscribe to:
Post Comments (Atom)
No comments:
Post a Comment