Day 13 - 20101012 馬德里, 塞戈維亞 [Antony]

今天要坐地鐵轉火車再搭巴士才到塞戈維亞(Segovia)，雖然上網買咗飛，不過穩妥啲都係早些少出發，去到火車站還有時間，便在站內買麵包做早餐．呢程火車算短，唔駛一個鐘就到，兼係中途站落車，所以唔敢睡覺．

去到 Segovia 火車站，站內有旅客服務中心，咁先正路嘛，拿了地圖兼問明點去便離開火車站，嘩，呢度咁荒蕪嘅，駛唔駛將個站放咁遠呀，除咗火車站同巴士站，得幾隻牛．一班火車得一兩架巴士接駁，好逼呀，兼沿路又多彎，好辛苦呀．

一落車就見到羅馬水道橋，好宏偉好壯觀，真係唔明古人點起條橋，利害利害．係水道橋旁嘅廣場看見好多著晒軍服的人，應該係為咗國慶日慶祝活動，看見咁多人在場，都係去餐廳 book 定枱，間餐廳已開業超過百年兼好有名氣，最出名係烤乳豬，好期望．還要等一個鐘左右才正式開門，所以幫水道橋影一輯沙龍先．

終於我們都係忍唔住，一見可以入得，即刻衝入去．間餐廳佈置幾有特色，好多動物頭，唔通以前呢度興打獵嘅．乳豬一隻八份，本來朋友想叫全隻，不過怕名大於實，都係每人一份穩陣啲，但係食完後佢哋好後悔呀．

食到飽飽，便出發去下一個景點大教堂，沿街直入，兩旁有很多店舖，不過好多都無開，唯有 window shopping，沿路都有一些古老建築和石像，不久便去到一個廣場，旁邊就係大教堂，都幾大幾靚，不過我們只在外面拍照留念．便繼續深入去下一個景點城堡，呢個城堡都好出名，聽聞廸士尼城堡都係參照佢，利害嗎．我們都只係在外面拍照，因為覺得遠觀睇晒整個城堡靚過近看．

影完便回頭走回到巴士站搭巴士再坐火車返 Madrid．回到市區後，便到一間百年老店，食乜，咪係鬼佬油炸鬼(Churro)，真係好似我哋啲油炸鬼，不過浸入朱古力一起食，仲好味，正．之後四圍 look，行吓百貨公司，去吓火腿博物館，買些手信．

不經不覺又到晚飯嘅時候，再搵間百年老店 Botin 試吓，又係出名烤乳豬，我唔諗咁多再叫烤乳豬，不過佢哋整得唔夠下午個隻咁好食兼又貴，好失望呀．

終於明天要離開西班牙喇，有啲失落，不過還有一個最最最重要行程係再訪曼聯(Manchester)，希望我們一齊順利，夢想成真．